au das joor ischs wider so wit! basel lüchtet, blinkt, schreit, rast, saust, schwingt, erschrickt, isst, kauft, luegt, stunt, gniessts, friert, ooh-t und freuts ufs neue. die 653. (odr so) Basler-Herbst-Mäss hed agfange ...
am suntig isch unseri familie um e mitlgid richer worde, mer hän nämli jetzt für e wuche e japanische ustusch schüeler, und däm hän mr natürli grad müesse das spektakel go zeige. resultat: dr leo heds fascht ihri neu-erlangene locke gstreckt, mir ischs härz ind hose keit, dr gaudi heds wie immer verdätscht und dr shintarou hed sich glaubs eifach nur gfrogt.
enyway, hüt heds keisse vortrag, und i has gfühl ka, dass i saumässig vill scheiss verzellt ha, aber es hed glaubs no halbwägs gstumme (dr calle hed sich übrigens super ufem hellrumprojektor gmacht, äs natürtalänt halt) und was i am schluss no ane-improvisiert ha - da madame alles no biz gnäuer hed welle wüsse - hed si am beste gfunde. wie sich denn d musig in dene bilder so usdrugge wurd ... tjo, also dr picasso hed natürli ganz klar die abstrakti version gwählt, will er jo dr asicht gsi isch, dass dr betrachter gschid gnue isch um sich e gige vorzstelle, sprich er muess em jo kei abbild lifere, und s gliche hed er wohl au ufd musig bezoge. er hed zwar eifach e statischi gige gmolt, aber wohl welle, dass mer sich d musig vorstellt, sich sini eigeni melodie macht (jaaa, genau, das hedr welle! mhm) dr toulouse-lautrec hingege hed d dynamik und erotik in siner pinselfüerig widerspiegle lo, und me fühlt d musig scho fascht, wo do gspiilt wird (das hed wenigschtens no so halbwägs hand und fuess) und bim musiker aka. calle seht mer jo s kabel und s mikrophon und weiss, dass das luti musig vilicht fascht scho lärm macht (hed si denn zwar nid so igseh, und hed gfunde, jaa wänn mer halt sich in däm metieeee beschäftigt, isch eim das halt scho bekannt -> was immer das heisse mag!)
uf jede fall, es isch ume und jetzt muess i mi nur no uf e mathe-tescht konzentriere! (hehe, nume)
uf jede fall wirds wohl jetzt mol zit zum biz kunst z zeige (i glaub mer erkennt was picasso und was toulouse-lautrec isch, ah jo und d fotos wäre die beschte vom p&l)


und wenn mer doch scho mol so sophisticated mit kunst um uns schmeisse köne mer doch au no es klassischs lied abiete. e wunderbari arie vom pavarotti, die letschte 40 sekunde sin bsunders z empfehle, denn wirds so schön dramatisch, hach so schön!!!

http://www.megaupload.com/?d=30RBTRKD (nomol für alli, näbem 'megaupload'-logo heds e dreistellige buechstabe code, dä eifach ins fäld näbedra igä und denn download drugge, und denn eifach de awisige folge)