so, jetzt chund dr party bricht. alles in allem glaubi hän d hannah und ich das guet gmacht, obwohl ich vill zvill sache ikauft ha, aber jänu, lieber zvill as zwenig!guet, am 17. sin mer also in burggartekäller und hän liechtli, discokugele und musig installiert, sprich eifach alles uf 70er tuned. denn ischs hei gange und d särah hed mer e frisur gmacht mit vill toupiere und hoorsprei (zitat: me darf mi nur vo links aluege). uf jedefall, sin mer denn mol döt hi und hän gwartet bis die erschte itrudle. und denn hän die einte tanzt und die andere hän trunke und die no andere sin eifach nur umegstande und häns wizig ka. s sin zwar nid so vill lüt ko wie mer dänggt hän, aber glich e stattlichi mängi. aber jetzt mol e paar bildli:

the one and only hostesses


the hostesses and the host-brother (and johnny)


vertreter der DDR (für alli wo sonnenallee gse hän, s outfit vom gaudi wär denn vom mario inspiriert) et moi
ernännenswärti zwüschefäll heds nid gä, högstens e EPIsode in dr kuchi mit 2 gescht wo sich alli gfrogt hän, hän si jetzt oder hän si nid, aber das blibt wohl e unglösts rätsel ;) aber suscht sin si alli nätt gsi, keine hed mer ufe bode kotzt oder isch on the verge of death due to misusage of alkohol. au dass ein vo de 1.klässler dr johnny nid soganz vertrage hed isch nid zu tragische folge cho und überhaupt, es isch glaubs guet gsi ... hoffi!

für alli wo kei wirklichs feriezil dä summer hän, i sag euch, in basel gids überall kleini egge wo mer entdecke ka und wunderbar sich vorstelle ka, dass mer wit wäg isch, und wenn mer denn hunger hed oder müed isch oder luscht uf entertainment hed, denn god mer eifach uf e tram und isch dehei, dass nenn ich mol service ;)

das isch doch mol e abwächslig zu de unnütze viagra-penisvergrösserigs-sex-spams. das könnt mer doch wirlich mol bruche. yay. das bringt mi ufs thema muetertag ... daniel und i hän uns überlegt überraschigs-muffins zbagge *harrharr-evil-grin*.
hmmm ... what else (nespress? no!) doch doch, öbbis wo die ganzi wält öbbis agod, will denn die ganzi wält nämmli wider im glichgwicht isch:

LEVI WILL BE REUNITED IN 3 WEEKS
jo suscht, dümpled mer halt im schwüle wätter umenand als alts, kaputts, abgnutzts WRACK* wo 4 wuche kei sport me mache darf. das isch halt, fraue und fuessball, kei gueti verbindig.

*Wrack, das; -[e]s, Plur. -s, selten -e (gestrandetes od. stark beschädigtes Schiff; übertr. für jmd., dessen körperliche Kräfte völlig verbraucht sind)



denn: da alli wo dä blog läse sowieso nätti lüt sin wo mini buddies sin

I INVITE YOU TO THE PARTY OF THE YEAR naja, vilicht au nid, but anyway AND YOU CAN BRING WHOEVER YOU LIKE!

ach, i bi in sonere schön deprimierte stimmig gsi und ha gfunde the greatest american lovestory aka brokeback mountain isch grad s richtig drfür. und wider ufs neue isch mer am schluss de träne noch gsi, wills doch eifach so schöön, ussichtslos und tragisch isch. (und wie mi mami wider sage würd, s hed so schöni landschafte ka) und denn das ganze no mit dere härzzerrissende musig vom gustavo santaolalla ... hach.

was mini party betrifft, i sehs noni so ganz, aber mer hän e ruum, e paar gescht und vilicht au no e discokugele. irgendwenn wohl au e flyer ... aber jo. ach e zügs isches. und e feriejob sött i au ha, und zwar im spitool als irgendwas. muess i mi ebe no bewärbe.

falls es irgendwer interessiert was i morn mach (in case i have a stalker), i gang morn an flomi, denn an velomärt und denn ind mitti mis vista go fülle. so if anyone fells like joining me, feel free to do so.

so, und jetzt gang i ins bett, mol luege öb i nach ere wuche schloflosi nächt vilicht doch no e paar anenanderhängendi stunde schlof find ... bonne nuit mes amis

hüt heds doch wirklich mol chle afo tröpfle und donnere, aber petrus heds sich warschins doch no andersch überlegt. aber woni im wald gsi bi, will i mini verlornere belongings gsuecht ha, sin alli krabbel und fliegefiecher ganz usem hüsli gsi und sin wie wild umegwussled will si gmeint hän, es chämt jetzt doch wirklich ändlich mol wider cho rägne. jedoch nach em 5. mol dr acker umpflüege zum mi ketteli z finde, hanis denn ufgä, jäjo, irgendwie muess i jo bestroft wärde für mini sünde, nid wohr. komentar vo dr redaktion: sorry, kleini änderig, jetzt rägnets definitiv. für hüt zobe häm mer thörles vorka, mol wider e 3stunde schungge aus der hand von kaspar geiger. aber s sott guet si ... isch jo au mol öbbis.
eigentlich hani gar nid vill zbrichte, muess i sage ;) aber leo, messi vill mol für di schöne daddel brief, hed mi sehr gfreut!!!
jaejo, lön mers mol debii ...

isch doch mol e weisheit wonoch s sich läbe lod. so wärde emel d ire vo irgendwelche lüt bi viva beschribe, resp. dr collin farell jetzt so ganz explizit. so, was gids sinnfreis z brichte us mim spektakulose läbe ... let me see ... wit obe würd do wohl d usstellig vo de maturarbeite 07 stoh. si wän si jo nid usstelle, oder nur zu zite wo alli schuel hän, will si kei platz hän wäge, wart schnäll, genau, em uuuumbaaauuu. jedoch geschter, hän si si im 04 usgstellt unds doch wirklich z stand broch, jetzt: man halte sich fest, d maturarbete vo letscht joor uszstelle.

schlächte witz, odr?

leider nei! langsam gods mer wirklich ufe sack, die verlange jetzt wohl wirklich meh gedult und verstädnis vo uns 4. klässler as mer verkrafte ka. i bi jo jetzt wirklich tolerant gsi, sit em summer, ha immer gfunde, neee dä lääärm, das isch doch nid sooooo schlimmm, das isch doch öbbis speziells sone umbau. aber jetzt jagts mer denn langsam wirklich dr nuggi use. es isch grusig, es regt mi uf, es isch lut (saumässig lut), si wän uns no e wuche lenger ind schuel schigge (HALLOOOO???) und jetzt das mit de maturarbete. tschuldigung, ha au für dä scheiss gschafft, ha au 300 stuz drigsteggt, nur will si e usgob hän welle, wo si köne usstelle, i will au, dass anderi lüt mini EMMA agugge und ihri kritik dezue abgä, ich will au die andere aluege.

gopf, es regt mi uf! sosache mache mi rasend.

und nid gnueg, jetzt müen mer no an dä scheiss novartistag. sooooo überflüssig.

jetzt mache mer do grad e itrag für mi papa, damit dä seht wie me das macht ;). hüt isch familiebsuech, sprich nid so spannend, schöns wätter, sprich spannender und rockstar party am obe sprich seeehr spannend.

und das wär, wenn mi papa und ich spinne und d freude vo photobooth entdecke.

euch allne e schöns wucheänd

um gottes wille hanich mi lang nüm gmäldet, nid dass es irgendwer chönt oder sött störe, mais trozdäm.
mini heissgliebti EMMA isch geschter offiziell abgä worde und sit däm fühlt me sich ganz glasse und ruhig, was jedoch nid guet isch, denn dr ärnscht vom läbe god witer. jaja. wie zum bispiil, dass me nach sine maturprüeffige, die schriftliche, no e wuche muess ind schuel go. hey, das isch doch mol was, sounds like fun!!! jaja, so gspäss erlaubt sich unseri schuel wäge kleinigkeite wie dä umbau.
hüt bini amene wahnsinnig sinfreie und ussagslose mittagsforum (ja es gid no lüt wo döt anegön) gsi, wo e dr. phil irgendwas seehr gschid über bilder und ihri wirkig uf uns gredet hed. jedoch nach 1 stund blabla und slideshow bini genau so schlau gsi wie vorhär und ha mi denn doch wirklich traut zfroge, was si team denn explizit für schlüss us dene studie zoge hed. die hedr wohl sälbr au nid gwüsst, und hed mi denn dumm anegstellt wie dr gymnasiast wo sowieso nie si intelektuelle stand erreiche cha. verzelltr also in allne schöne künstlerische fremdwörter was si denn sich froge und wie si das erarbeite, und meint denn, öb das mini frog beantwortet heig. nei natürlich nid, bispiil bitte (intimidated laugh by the rest of the audience) und denn holtr irgend e bild füre vomene kleks und seid genau s gliche nomol wonr vorhär gseid hed, eifach mit no meh fremdwörter und fachusdrück, damit i mi joo klei und unnütz fühl, frogt mi denn nomol, öbs denn jetzt klar seig, und will mer dä gspass langsam zdumm worde isch, hani denn schön brav gnickt und er traut sich doch denn wirklich süffisant zsage, mhm i glaub nid. hey, das isch jo s letschte, dä ka jo nidmol kunscht schaffe und meint er chönt si interpretiere, aso bitte, pathetic!
au lustig isch hüt gsi, dass i mi bahnwärter thiel ha welle verschönnere und dr liebi herr zumbühl hed denn gfunde: jaa bitte, evelyn, ihre kinder werden es ihnen nicht danken wenn sie eine solch verkrizzelte ausgabe erhalten werden. und ich grad druf: sie, das köne si denn mol für türs gäld verkaufe. hihi, ischr grad baff gsi, dass ihm uf das gantwortet worde isch und isch mit sim schnüsige santiklause grinse vorne gstande und hed irgendwas vom dürremat gschnuurt (oder gotthelf) wo bim kolleg sim grossvatter obedra gwohnt hed und d wand vollkrizzled hed, und woner denn uszoge isch, hän si das mit freude übermolt. jetzt hän sis aber für vill gäld wider restauriert. und hed mi denn no gfrogt öb i denn die einzig wahri künstlerin in dere klass seig ... weiss jetzt nid wasr dodemti gmeint hed, aber mer nämes gärn a. au hämers hüt, das isch was für mini liebi leo, seehr lang und intensiv vo züg ka. ist ja das dingsymbol in der novelle bahnwärter thiel ... hani grad an unseri kleini mataphergschicht müesse dängge.

no e kleine fact für ufe wäg (es isch nur fascht titelstory vo 20min gsi, isch jo nid wichtig, dass irgend e psycho in amerika amok lauft und 30 lüt abknallt, neee): d schwizer hän 123mol sex und durchschnittlich beträit d lengi vom akt 19 minute was ei minute lenger isch als dr wältdurchschnitt. na das nenn ich leistigssport!

das wär s video zum song, und - um wider mol s kultwort2006 zbruche - sehr skuril das ganze, aber trozdäm sehr farbefroh und natürlich london-underground-indie, ganz wichtig.
das isch jetzt mi dritte tag dehei und langsam aber sicher cha mer mi bald ind zitronefarm ilifere. i muess wider ind d schuel, i bruch wider autoritätspersone wo mer sage was ich mache muess damit i wider was z tue ha.
naja, so schlimm ischs scho noni, aber dass i 2 wuche gfehlt ha macht mer scho chle sorge...
die grippe aber isch eini vo dr ganz schlimme sorte, die isch nämmli so hinterrücks, nid wirklich stark aber glich do und denn tanzt si grad uf allne bühnene vom krankheits-broadway (und do ka mer wirklich vomene broad way rede bi däm scheiss spektrum). aber s schlimmschte isch, dass si eim süchtig nach schoggi macht ... ganz schlimm aber was au no schlimm isch, isch dass i znacht abstrusi albträum ha, ab dene i schwiesgebadet ufwach ... zimlich schreg das ganze! aber sehn mer s positive dra, i ka intelektuell umegammle und mir e ileitig fürd ma usdänge
an dere stell möcht i no hinzuefüege dass nasebluete sit jetzt au no zu mine beschwärde kört und dass ich mini erschti stürerklärig usgfüllt ha, tjo, jetzt gilts ärnscht leuts ...

trotz mathetescht und em wüsse, dass dr nochtescht saumässig schwiriger wird si, bini dehei bliibe um mi fieber und hueschte uszkuriere. s isch e rainy day und ich daddle in mim diva-morgerok umenand und ka mi nid erwärme irgendöbbis gschids z mache, wie ma schribe, effi läse oder mathe ufgobe löse.
sit geschter hed d familie schellenberg/schjølberg-henriksen e neus mitglid, nämli dr kosmonaut otto. ganz e knuffigs verdruggts kleins würmli mit riiisige auge. die babies chöme mitlerwile us allne egge gschosse und unseri family wird immer we grösser, schön schön!
e witers schöns erreignis isch au, dass s mavie hörbiger sit em 5. dezäber mit em michael suchandsuch verhürotet isch. toll gell? nid so schön isch das aber für ihri verehrer uf fanbasis gsi, die sin fascht an liebeskummer vergange und hän nümm gwüsst was mit ihrem läbe azfo. so hani das emel useme blog verno. armi kinder, aber au wenn dr heath ledger jetzt sini dawsonscreek-michelle hürotet, d wält god drwäge nid unter, das isch jetzt nun mal so, ka mer nid ändere, gids nur ei wahri sach wo mer do ka mache: suck and deal.
uf jede fall hani wider mol e lied zum abelade für alli wo kle füür unterem arsch bruche, e feel-good song, oder e conquering-the-kafikränzli-hymne (gelle mini liebi leo;) )

http://www.megaupload.com/de/?d=OZORN2WN

das wär grace kelly vo mika und isch jetzt no1 in ängland und wird au do bald in jedem radio rauf und runter gspiilt wärde, und i hoff dr gueti herr hed nüt drgege, dass i das lied vor siner eigentliche release do abiet ...

sodali, wider dehei und alli schöfli sin mehr oder minder ganz ihrne mamis und papis do in basel überreicht worde. mer hän nur e knübänderzerrig, e kleins schleudertrauma und ca. 3 fieberkranki z vermerke ka, sus wäre si alli ganz.
tjo, s lager - back to kippel - isch zimmli glatt gsi mit 5 täg reinstem sunneschin wo eim dr schnee unter de füess wäggschmolze isch. um an nostaligischi pg-erinnerige azknöpfe, olive hani bis am letschte daag nid gseh, sorry leo, ha mer wirklich müe gä, aber ins ZUDILI bini gange. s skifahre isch au no ok gange, aber halt nid grad wunderbar. jedoch mini black pearls hän ihres beschte gä und mit augeklappe und rämtämtätätämtäm isch denn au die schwarzi piste durab gange. isch wohl d wuche vo sich in anderi rollene versetze gsi ... jetzt bin ich mol in dr leiter-lass-mi-bediene-autoritätsperson-rolle gsi (und anderne nid an dere stell erwähnenswärte rollene), hed zwar nid immer so funktioniert mit eme hufe pubertierende jungs, aber am schluss isch denn das glich no irgendwie gange. übers ässe ka me sage, dass es sehr fein gsi isch, nur hani allpot bleiige ka, nid so erfreulich ...
cambridge hani e satts C ka. findi nid so lässig, sött besser si, aber jänu, ka mer wohl nid ändere.